生命熱線籌款 郭炳湘細劉夫人支持

【明報專訊】噚日係「生命熱線」一年一度慈善步行籌款日，大會特別邀請兩個名譽贊助人——新地非執董郭炳湘嘅太太李天穎（左）、富商劉鑾鴻（細劉）太太（右）出席，接收來自各方企業嘅善款（圖），最後籌到近200萬元善款，郭太呼籲大家為防止自殺工作出一分力，希望未來多啲做青少年服務。


「生命熱線」執行總監吳志崑話，該會喺2012至2013年度接獲3.4萬次求助來電，而今個財政年度仲有兩三個月先完，但求助來電已多咗約5%，主要係感情問題、就業同經濟問題，求助者以30至40歲為主。但佢哋都好關注青少年自殺情况，打算未來同學校合作，主動接觸有情緒困擾嘅青少年。


（李澤彤攝）