「融」當選民記年度漢字

【明報專訊】民建聯每年都會搞年度漢字選舉，今年就揀咗「融和」個「融」做年度漢字。評審之一、立法會主席曾鈺成話，揀選呢個字係因為覺得過去一年又冰又有霧，希望來年度「冰融霧釋」，明年香港處境更光明。


曾鈺成：希望大家熱情融冰

民建聯提出，以爭、辣、激、淨、穩、憂、信、融、廉、安10個候選年度漢字，而「融」字一共收到7385份提名表格，當中有6755份為有效提名。曾主席話，社會各方家有好多嫌隙同猜疑，希望大家嘅熱情能將迷霧消除。評審之一嘅正生書院校長陳兆焯就話自己係教書嘅，希望學生能夠融會貫通， 又話正生學生都有特別背景，希望佢哋能夠盡快融入社會。


其實「融」字嘅本義，係光明之意，亦解炊氣上升。民建聯1月21日會用電腦抽籤抽出15個參加者，由專人通知佢哋領獎。


不過，其實民建聯呢個選舉，公眾都可以提名其他字，雖然民建聯無主動公布，但佢哋收到另外11個字嘅市民提名，其中一個票數亦好高，就係「恥」，有成707人提名，票數同排第二嘅「穩」字，只係差幾十票，但民建聯公布嘅結果就無「恥」字。