李慧玲為娘家火併大班

【明報專訊】《明報》換總編輯事件成為噚日各大電台烽煙節目嘅題材，但估唔到網台D100節目《風波裡的茶杯》主持鄭經翰，噚日喺節目大鬧明報早已失去公信力、衰嘢罄竹難書，仲話如果佢係老闆都會炒總編輯劉進圖。大班咁講，喺明報出身嘅商台名嘴李慧玲終於忍唔住，打電話去D100鬧爆大班，為明報講好話，讚明報近年有唔少出色嘅偵查報道，包括去年嘅湯顯明涉貪腐事件。


大班指明報唔點報道DBC停播

Emily唔明大班點解咁鬧明報，但大班就自爆同明報其實有私怨，認為明報當日唔係點報道佢嘅DBC停播事件。大班又話明報喺總編輯劉進圖管理下已變成「梁粉報」，又揶揄明報同事不滿管理層空降馬來西亞人做總編輯只係「鄉土情」。


李﹕只怪煲呔做得唔好

李慧玲唔滿意大班不但唔幫忙傳媒同業，仲喺度落井下石，所以用聽眾身分致電節目反駁，「歷史可以咁講咩？唔可以嘛大班。要怪就怪你老友曾蔭權做得唔好，令唐英年選唔到（特首）」。佢又讚揚明報近年有好多佳作，包括揭發唐英年及梁振英僭建、湯顯明事件等。


鄭經翰於是話，如果明報同事唔滿意今次決定，應該以集體辭職嘅力量對抗；但李慧玲話，雖然佢同意社會要有更多人出來為事件發聲，捍衛新聞自由，但會尊重明報同事決定下一步行動。