愛港力狙擊阿人幾條街

【明報專訊】踏入2014年，港台今年第一次嘅《城市論壇》已經火花四濺，噚日邀請咗工黨李卓人、民主黨單仲偕、自由黨周梁淑怡同民建聯蔣麗芸喺九龍城賈炳達道公園，講吓特首施政、對施政報告期望等，不過台下出席者對題目一於少理，節目未開始就已經大鬧李卓人「反中亂港」，搞到主持謝志峰都發火，未開場已經要趕走其中一個阿伯，又話要向警方投訴咁。


高舉示威牌 話係「李賊人」

雖然陳淨心退出愛港力，但愛港力噚日亦有約10人去狙擊李卓人，節目前後都不斷鬧佢搞亂香港，無論李卓人講民生定係政改，佢哋都一樣照鬧，亦有其他阿伯自製示威牌，話李卓人係「李賊人」。節目完咗，佢哋仍然唔放過李卓人，追住佢嚟鬧，高舉示威牌追足幾條街，李卓人要由警方同保安護送下，由公園行到去九龍城廣場，愛港力先肯收手。