新舊議員聚首 喜見95歲王霖

【明報專訊】立法會噚日舉行午宴，邀請做過立法局或立法會嘅議員返立法會，一齊食餐飯敘吓舊，好似首個基層代表進入議會、現已95歲嘅前議員王霖，當年做委任議員嘅聖保羅書院前校長夏永豪，連前政務司長唐英年等都有出席，反而另一重量級人物陳方安生就甩底。同王霖同枱食飯嘅民建聯葛珮帆就話，聽一班前輩講先知，原來王霖幫議會爭取突破，包括用廣東話辯論。


王霖首位基層入立局

95歲嘅王霖仍然精神奕奕，佢同Emily講話出席呢個活動好開心，可以見番一班新舊朋友、靚仔靚女咁，雖然佢係立法會大樓嘅嘉賓，但噚日佢亦帶團，帶住參觀立法會嘅市民周圍行吓，分享佢嘅議員生涯。至於前議員霍震霆同蔡素玉重返議會，亦對議會唔同類型嘅紀念品好有興趣。


唐唐拒同路福西影相

唐英年噚日重返議事廳，向來有出位諗頭嘅新民主同盟范國威就特登帶咗隻「路福西」去食飯，打算拎住隻狼公仔同唐唐合照，不過唐唐就醒喇，無畀佢攝到位，以「唔好開玩笑」為由婉拒。唐唐話，大家食飯時都有講起喺舊立法會大樓嘅日子，大家都覺得舊大樓細啲、溝通好啲，家感覺比較疏離，但佢都相信官員有責任繼續同議員多溝通喎。