YouTube年度大熱 「捱麥記」片威威

【明報專訊】網絡視頻嘅內容不時成為熱話，YouTube噚日公布本年度熱播排行榜，其中由港視製作嘅《「香港電視網上首播」警界線第一集（一氣呵成版）》，奪得YouTube熱門非音樂影片排行榜第三位，至今有逾118萬點擊率，但就不敵榜首嘅《一生只想尋找一個肯挨麥記的女人》，同埋轟動一時、排第二位嘅《14巴港女》片段。


《警界線》第三位

《警界線》第一集早喺發牌風波之前已經喺YouTube首播，當時已經引起唔少人討論，Emily睇完都好想追埋第二集，直至政府拒絕發牌畀港視事件後，更加有唔少人上網重溫，令影片點擊率大增。


不過，講到氣勢最強勁，都係排行榜首嘅《一生只想尋找一個肯挨麥記的女人》，點擊率近180萬，唔單止引起社會熱烈討論，亦令佢躋身YouTube熱門非音樂影片、兩性關係影片兩大排行榜嘅榜首，成為今年雙冠軍。


「YouTube香港2013報告」仲話，原來全球每月平均有10億用戶瀏覽YouTube，觀看影片長度達60億小時，每分鐘有100小時影片上載，真係非常繁忙。