「港人遷台」傳聞 解釋不停

【明報專訊】香港人「移民台灣」新聞炒得火熱，特區政府早前已澄清，媒體將因為讀書、工作而申請逗留數字，同申請定居嘅數字混為一談，話無多咗港人移民台灣。噚日台北經濟文化辦事處舉行茶敘，負責搞簽證嘅首席副組長盧正雄人氣最高，皆因唔少記者包圍佢追問「港人移民潮」一事，Emily企喺度10多分鐘，盧正雄至少回答同一條問題3次，真係佩服佢嘅耐性。


根據台灣內政部入出國及移民署資料，截至今年10月，港澳居民申請去台灣定居嘅人數為529，而去年全年人數為711，前年人數為540。盧正雄估計，今年全年嘅數字與去年差不多，都係700人左右。睇番數字，過去10年移民台灣嘅人數每年約500，對上一次移民台灣熱潮係1993年至2000年期間，每年有1000至近1700人不等，據現有資料單年最多港人移民台灣係1991年，有3703人。