樹根不滿被「嘟」﹕「肯肯定」無爆粗

【明報專訊】民建聯立法會議員鍾樹根又因言論惹煩惱，前日播出嘅now節目《大鳴大放》，主持人李鵬飛問佢特首管治有無問題時，樹根就話，「睇你從邊個角度去睇，話完全無問題又唔係嘅，肯X定係有問題，呢個世界，沒有最好」。節目播出後，now TV知道出事，噚日喺片段上「嘟」咗呢個疑似粗口諧音字。但樹根就呼冤，話當日只係話「『肯肯定』係有問題」。


噚日網上開始流傳樹根嘅「肯肯定」片段，《大鳴大放》工作人員發現後，即刻翻看片段，覺得樹根所講真係似粗口音，而據廣播條例，播出疑似粗口都會出事，為免被投訴，所以「嘟」咗樹根嘅說話。工作人員又話，現場攝製節目時因為與會者爭論熱烈，未及時察覺。


樹根就好勞氣，仲發聲明澄清，叫now TV唔應該「嘟」佢，因為會「誤導觀眾錯誤以為本人真的有講粗口」。佢話被人喺網上惡意散布佢講粗口，仲刻意製作抹黑短片歪曲事實。佢仲話，當晚節目後，節目編導更笑稱「今日節目好精彩，爭論好激烈，大家都無講粗口」。