粉紅錄音筆 難倒陳弘毅

【明報專訊】基本法委員會委員、港大法律學院教授陳弘毅噚日又上咗民主黨主席劉慧卿網上節目做訪問。眾所周知，陳教授講嘢溫文，Emily同一眾行家擔心聽唔清楚陳教授講嘢，諗住放定錄音筆喺枱面錄音，點知發現枱面有支粉紅色錄音筆。


正當Emily諗緊邊個行家咁嬌俏嘅時候，陳教授忽然拎起呢支錄音筆撳呀撳，佢話因為自己訪問無做筆記，所以要錄音做定記錄，第日寫文聽番方便啲。不過，佢似乎唔係太識用呢支錄音筆，因為記憶體滿咗，而佢搞咗好耐去了解點樣刪除舊檔案。


陳弘毅上星期先去完北京，參加由港澳辦前副主任陳佐洱牽頭嘅全國港澳研究會會議，返港無耐就去接受卿姐訪問。佢大讚民主黨，話社會應對民主黨對民主進程嘅貢獻予以肯定云云。