周一嶽想上港視高歌

【明報專訊】香港市民希望政府發牌畀港視，原來平機會主席周一嶽都支持發牌畀港視，不過與市民想睇優質製作嘅出發點唔同，佢係因為想上港視唱歌，都算叫做「同一個夢想」吖。


講發牌：值得做就點都要做

出名愛唱歌嘅周一嶽，曾經以《忘不了你》技驚全港，今次大家又有得聽「嶽曲」，周一嶽對香港電視主席王維基話，佢今晚要上TVB一展歌喉，仲話希望日後有機會喺港視嘅電視台唱歌。


噚日周一嶽同王維基出席醫管局活動，其間方道生醫生問王維基，政府唔發免費電視牌，係咪因為港視行得太前？坐喺「魔童」隔籬嘅周一嶽認為，冇牌唔係因為港視行得太前，最緊要係要諗清楚，件事係咪值得做，值得做就無論如何都要做，跟住同王維基講，「聽晚我又上無綫唱歌，希望有朝一日可以上你個台唱歌」。


有港視員工將呢次活動照片傳上facebook，話「周醫生，多謝你」。