唱K要show身分證 聽眾鬧爆

【明報專訊】市民對私隱專員公署指California Fitness過分收集市民個人資料呢單新聞好有feel，幾位嬲爆嘅聽眾噚日打電話到港台《千禧年代》，鬧爆去美容院做按摩、去卡拉OK用生日優惠、去屋苑探親統統都要出示身分證，認為唔合理。


用團購券都要睇

有聽眾話，已經畀卡拉OK嘅工作人員睇咗出生月日，但係對方點都要攞佢張身分證睇出生年份，聽眾話想公開間卡拉OK係邊間，主持人葉冠霖就話要聽吓件事係點先。點知聽眾忍唔住爆咗呢間卡拉OK嘅地區。


有聽眾以團購方式買優惠券做按摩，美容院要攞佢張身分證辨別有冇重複購買，聽眾話可提供十間八間美容院都係咁做。仲有聽眾投訴，話去探哥哥，同屋苑保安熟晒都仲要攞身分證登記，聽眾請電台幫手向私隱專員公署投訴，主持人就話相信公署有聽呢個節目。