中大藏品展 謝婉雯自述曝光

【明報專訊】中大同科大噚日同時間有重量級嘅展覽廳開幕，中大趁今年創校50周年，為籌備兩年嘅「大學展覽廳」開幕，展出中大創校以嚟幾百件珍貴展品；而科大就有「香港潮州商會高佩璇展閱廳」開幕，展出珍貴罕有嘅古老地圖，以及科技發展史珍藏。兩個展覽都由噚日開始無限期對外開放，大家有眼福喇。


兩大學展覽廳 無限期開放

中大嘅展覽設於校內大學圖書館入面，Emily噚日去到時真係幾興奮，門口「大學展覽廳」 五字由前中大校長金耀基所題，展覽一共有約150件中大嘅歷史展品，包括有由創立新亞書院嘅國學大師錢穆頒發畀著名歷史學家余英時嘅新亞學院（中大前身）畢業證書，SARS英雌、殉職醫生謝婉雯報讀中大醫學院時嘅自我介紹資料等。


至於科大圖書館入面嘅展覽，就展出咗出自16世紀歐洲地圖繪製家奧得利烏斯（Abraham Ortelius）出版嘅第一幅中國地圖、意大利天文及物理學家伽利略1638年所寫嘅第一本現代物理學教科書Dialogues concerning two new sciences（關於兩門新科學的對話）等，很具歷史價值。