海富走火警 走完有茶點

【明報專訊】近排天氣轉涼，風高物燥，政府總部同對面嘅金鐘海富中心噚日無獨有偶都舉行走火警演習，唔通因為中間隔咗條行人天橋，驚一邊火燭會波及另一邊，所以要一齊搞？

但隔咗條馬路，走火警嘅情况就有天壤之別，海富中心走火警就有Pacific Coffee嘅茶點食！Emily見到海富地下設咗個counter，叫做「火警演習茶點領取處」，仲有一袋袋食物包等人攞，裏面有罐裝飲品同蛋糕。


海富中心係港鐵旗下物業，港鐵發言人話，為提高喺海富工作嘅人防火意識，每年會舉辦至少一次防火演習，今年為答謝佢哋嘅參與，就預備咗茶點。但現場所見，好多公司都係派一個人做代表，幫同事一次過攞晒啲茶點，個個人都攞住十袋八袋走，似乎失去咗原本走火警嘅意義噃。


政總亦走火警 800人參加

政府總部嗰邊亦差唔多時間搞走火警，但有喺政總做嘢嘅人就話，噚日中午火警鐘響咗好耐，初時都無乜人願意走落去，仲話如果有茶點食，佢都願落去。行政署發言人就話，今次都有800名公務員參加，佢哋無夾埋附近大廈一齊搞。