志雲大師認成日檢討節目

【明報專訊】經常喺節目批評政府嘅商台主持李慧玲，上周五突然從晨早議政節目《在晴朗的一天出發》調回黃昏的《左右大局》，令唔少人質疑商台係咪為咗續牌向政府示好。有消息話商台行政總裁陳志雲過去一個月幾乎每日都去搵李慧玲「檢討」節目，今朝就會喺《晴朗》「開咪」嘅「志雲大師」噚日就同Emily講，呢啲檢討會成日都開，但就無畀過壓力李慧玲喎。


據了解，陳志雲開咪應該唔會坐足3個半鐘，但連商台中人都好難估計佢嘅節目想點，因為佢個人好多諗頭。志雲大師就同Emily賣關子，叫大家今朝起身聽佢開咪。


李慧玲噚日喺自己facebook話﹕「跑步，經過球場，小朋友在踢波，好開心。打仗，最重要是團隊。我很不捨也很感謝我的同事。」


李慧玲不捨《晴朗》團隊

Emily問過李慧玲，佢話今晚照常開咪，只係唔捨得早上節目嘅團隊，據知佢今次係「孤身」返《左右》，同佢分屬友好嘅梁美儀同郭志仁都留低喺《晴朗》。講嘢一向尖銳嘅李慧玲同Emily講，喺黃昏開咪唔會放軟手腳，近排特首梁振英解釋電視發牌時話行會猶如陪審團，佢就覺得好唔合理，諗住今晚都會講吓。


伙拍李慧玲做節目嘅《左右》主持黃潔慧就話，周末有同李開過會傾節目。