鄉村師範同學 重遊總督別墅

【明報專訊】行政長官粉嶺別墅有60幾年歷史，呢度除咗先後係前港督同現時特首嘅別墅，亦見證過香港早年教育嘅發展。特首梁振英（CY）噚日喺網誌話，1946年，二戰剛結束，當年嘅港督楊慕琦借出總督別墅畀香港官立鄉村師範專科學校作為臨時校舍。呢間學校嘅校友噚日就重遊舊地 。


二戰後曾作臨時校舍

師範專科學校同學會早前已提出希望參觀別墅，原本定喺9月22日，但當日碰上風暴襲港，活動改期。


CY話，噚日下午，佢就喺粉嶺別墅接待同學會代表，畀佢哋緬懷昔日點滴。同學會一名永遠名譽顧問，係已屆百歲高齡嘅馮翰文老師。CY話，馮老師係唯一一位喺師範學校辦學8年來一直任教嘅教員，喺教育界德高望重，培育出多名傑出老師，可惜馮老師抱恙未能參加。CY祝願馮老師早日康復，希望佢能夠重遊舊地。