國泰空姐假期薪酬

【明報專訊】國泰一班空姐空少苦苦追討假期工資，經過5年抗爭，終於同資方傾好補發假期薪酬嘅計算方法，將會有6000名空中服務員喺月底獲得「回水」，相信平均每人攞到近萬蚊，總賠償額估計超出6000萬。


不過，國泰工會嚟緊又要傾明年加薪，仲要爭取外地來港空服員嘅房屋津貼。被指係全港加薪指標嘅國泰航空，可能又會受到關注，而工會就做緊問卷調查，了解會員嘅加薪期望。


早喺2008年，國泰3名空姐就成功爭取將飛行津貼、地勤津貼、售賣免稅品佣金等3項酬金，納入法定假期薪金計算，但國泰2011年不服兼上訴反勝，結果3名空姐要再上訴，最終喺上年9月勝出官司。至於國泰喺過去一年，就一直研究補發假期薪酬嘅計算方案，其間勞資雙方仍然對「工作天」嘅定義有所爭拗，更擔心會因而引發另一場官司。


不過，近期雙方終於傾好解決方案，預料會喺月底回水畀6000多個空姐空少，令呢場糾纏咗5年嘅勞資糾紛畫上句號。