鄧惠鈞轉去義工學會

【明報專訊】做咗新聞統籌專員不足一年嘅鄧惠鈞，早前因為健康理由辭職，佢當時話自己耳鳴、視力嚴重退化，所以要離開。

不過，唔知係咪離開熱廚房，唔需要成日諗拆彈，身體都好得快啲，小休兩個幾月，政府噚日就公布鄧惠鈞將會有新路向，係做「香港義工學會」管理委員會成員。

政府噚日出稿，話前任行政長官及政治委任官員離職後任職諮詢委員會，認為鄧惠鈞新工作唔會損害及削弱政府表現，亦唔會令人擔心有延後報酬或利益、有負面觀感而令政府尷尬等；但係鄧惠鈞亦要遵守規定，包括一年內唔准參與政府事宜嘅游說工作等，因此批准佢嘅離職後工作申請。

鄧惠鈞下月1日上任。按文件介紹，工作性質係出席有關學會嘅會議，為學會建立會議制度、促進義工發展等活動等提供意見。