吳光正猛落閘 眾記者猛兜圈

【明報專訊】政府唔向香港電視發免費電視牌照，引起全港關注。九龍倉集團旗下嘅有線電視獲發牌開台，噚日九倉主席吳光正出席一個學校支援計劃起動禮，Emily同一眾行家聞風而至，大家都好關心新電視台「奇妙電視」有咩節目，點知一到傳媒問答環節，吳主席就「落閘」，話希望記者問同計劃有關嘅問題喎。


記者發揮創意，有人問吳主席支唔支持學校買多啲電視機、有多啲電視頻道，等學生有多啲選擇，亦有外籍記者問吳主席，增加免費電視頻道，播多啲英文節目，可唔可以提升學生英語水平等等。雖然吳主席一一以「我只係商家，唔係教育家」將個波踢畀同場嘅中學校長，但記者嘅永不放棄兼創意提問，令全場笑聲不絕。