立會議員加薪$2960

【明報專訊】立法會議員又有人工加。立法會秘書處噚日公布，由本月1日起，立法會議員薪金將會增加3.5%，議員酬金由每月84,490元調整至87,450元，即係多咗2960元，羨慕死打工仔！議員人工加，但議會效率有無因此快咗呢？議員發言質素又有無因而提高？呢個要留番畀市民自行判斷。Emily聽聞，天主教監察組下星期會公布議員考勤報告，究竟議員拎8萬幾蚊人工值唔值？大家拭目以待。


監察組下周出考勤報告

2012年，議員由7.3萬加至8.4萬水平，今次係按照丙類消費物價指數嘅變動幅度再次加薪。議員除咗有得加人工，醫療津貼同部分工作開支還款額上限亦調整，醫療津貼金額由每年29,420元增至30,450元；支付辦事處營運開支嘅工作開支償還款額，就會由每年唔超過2,166,310元調整至唔超過2,242,130元。


鄧家彪﹕加唔加唔緊要

不過，勞工界鄧家彪就話加唔加人工唔緊要，仲建議將加幅扣起成立專戶基金，以作議員助理約滿酬金之用。好可惜呢個建議喺上屆立法會不獲採納，鄧家彪話佢會繼續入多啲問題、提多啲修訂，積極跟進喎。


獨立議員謝偉俊話，佢做議員唔係為錢，份糧都係拎去補貼地區工作喎。公民黨梁家傑就話今次都係跟通脹加薪啫，至於大家覺得佢有咩可以改善，隨時出聲，本身喺大狀嘅傑哥仲話，自己噚日由朝早10點踩到深夜，收咁嘅人工直情超值！