新倫敦巴士 香港唔多啱用

【明報專訊】繼九巴珍藏嘅兩部古董巴士「烏嘴狗」丹拿A型巴士，與亞比安55型巴士喺尖沙嘴香港歷史博物館展出後，適逢由著名倫敦奧運火炬設計團隊Heatherwick Studio設計嘅「新倫敦巴士」（New Bus for London）訪港，九巴噚日特別安排3部巴士喺西九文化區公開展覽一日，展示巴士設計60多年嚟嘅演變。


新舊巴士昨同場

去年先至正式喺倫敦投入載客服務嘅「新倫敦巴士」，無論外型及「內涵」都因應時代轉變而調整。「新倫敦巴士」採用混能模式驅動，配備歐盟第五代環保引擎，最高時速80公里，較「烏嘴狗」最快嘅40公里快1倍。九巴就話，新倫敦巴士缺乏適合本港氣候嘅空調系統，及採用開放式尾門設計，未必適用於本地環境，九巴暫時唔考慮引入香港。