卿姐再來吊帶look？

【明報專訊】民主黨主席劉慧卿做過無綫記者，無綫節目《新聞檔案》早前播出1980年嘅卿姐，戴住太陽眼鏡、身穿吊帶裙喺新加坡「做扒」片段，引起高登友關注！星移物換，但呢條吊帶裙一直喺卿姐衣櫃內，卿姐仲講笑話下星期搞茶敘著畀大家睇喎，卿姐，講過要算數㗎。


1980年裙子仍在

當年28歲嘅卿姐去新加坡做當地點解決交通擠塞嘅古仔，家陣記者著少啲都被批評，點解卿姐當年可以著得咁性感，仲要戴超？卿姐話當年從來無人鬧佢，因為天氣熱，都唔覺得有乜嘢問題。至於係咪下星期著，卿姐都補多句，話要喺黨內諮詢吓先，黨友記者要畀啲壓力佢喇！另外，卿姐又大爆當年曾被上司關偉罵，皆因佢唔小心上下倒轉咗無綫嘅咪牌。可能大家平時無留意，無綫咪牌有3種色，當中紅色應喺最底。卿姐引述關偉話，要大家記住個咪牌係「紅底」喎。