天文台呼好彩

【明報專訊】風暴天兔上周來勢洶洶，但最後好彩喺香港北面掠過，風力不似預期，甚至有人話佢無料到。但天文台噚日解畫，就係差咗一啲，天兔無喺香港以南約100公里外掠過，否則香港就會遇到風暴潮再加天文大潮，鰂魚涌嘅海水高度會升1.7米，去到3.9米，同1962年襲港並造成嚴重破壞嘅溫黛差唔多，足以造成巨大破壞，例如海水倒灌內陸。


水位險大升至3.9米

天文台高級科學主任莫慶炎喺天文台網誌發表題為〈歷史差一點重演〉文章，話用電腦模擬天兔接近香港時唔同路線會有乜嘢影響，發現如果佢喺香港以南約100公里掠過，鰂魚涌水位會由2.2米上升1.7米，達到3.9米，同溫黛時相當接近（3.96米）；若天兔喺南面200公里掠過，水位升幅更高，「差一點便歷史重演啦！我們真夠運，香港確是福地！」

事實上，天兔形成初期，天文台已罕有發出預警，但最後天兔喺香港以北約80公里掠過，影響大減，配合天文大潮，令維港水位升至2.8米，部分低窪地區輕微水浸，唔怪之得有人話風力不似預期。