林慧思與父多謝市民支持

【明報專訊】社民連前晚舉辦7周年會慶暨籌款晚宴，副主席吳文遠話總共籌到30萬，準備用嚟打官司。早前捲入粗口罵警風波嘅小學教師林慧思，同爸爸林森成都有出席晚宴，佢喺台上發言嘅時候不斷多謝大家對佢嘅支持，林森成更點名多謝在場嘅前全國政協委員劉夢熊對女兒嘅慰問。


林父點名謝劉夢熊

林慧思前晚同大家講自己家OK喇，仲話唔好意思，皆因自己初出茅廬，「唔知頭唔知路」得罪好多人，佢話自己後生女唔識世界，但係經歷咗今次事件後，大家都知道共同敵人係邊個啦。林老師又話，家差唔多每日都收到學校（寶血會培靈學校）嘅電話，感到好難過。林慧思會延長休假至10月底。


吳克儉：不會催學校交報告

噚日喺北京訪問嘅教育局長吳克儉同傳媒茶敘時就話，仲未收到林慧思老師所屬學校提交嘅報告，但因為唔想令校方有壓力，所以無催促學校交報告，亦唔會定死線。至於收到報告後會唔會加入教育局嘅意見，再提交畀行政長官梁振英，佢就話仲未有決定。