CY第10次「內交」

【明報專訊】立法會10月先至復會，本月變咗政府出訪旺季，大玩空城計，繼一批副局長同政治助理喺本月24日到28日上京研修國情，特首梁振英26至27日就會率領香港工商及專業界代表團訪問重慶，商務及經濟發展局長蘇錦樑都一齊去。


CY到訪重慶，剛好有個渝港經貿論壇，佢要致辭，然後順道主持香港駐重慶聯絡處喬遷、同埋香港貿易發展局重慶代表處開幕儀式。CY又會同代表團考察重慶兩江新區參觀當地企業，仲會探望喺重慶讀書同經商嘅港人。講起重慶，Emily記得重慶前市委書記薄熙來嘅受賄等罪會喺聽日宣判，CY隔兩日過去，唔知同內地官員吹水時，會否傾呢單嘢呢？


11月去廣西

今次已係CY上場以來第10次「內交」之旅，CY之前出訪貴陽時就預告，嚟緊11月去廣西。至於以官式身分去外國訪問，暫時就只去過美國紐約。