碧桂園太子女打低龍湖老闆 當女首富

【明報專訊】又到每年一度公布內地首富嘅時候，噚日胡潤百富榜公布今年中國女首富排名，由碧桂園（2007）太子女楊惠妍以510億元（人民幣．下同）身家，從龍湖（0960）董事長吳亞軍手上奪得冠軍寶座，亦係佢自2008年之後，第二度成為女首富。胡潤公布嘅資料顯示，楊惠妍身家比去年多咗成55%，反而吳亞軍身家就縮水26%，得番280億，結果由第一變第三。頭5名女富豪當中，有4位從事房地產，看來賣磚頭真係可以發達。


頭5名4位從事房地產

對於楊惠妍同吳亞軍，大家可能已經耳熟能詳，反而小琴今次想講吓亞軍果位女富豪。今年繼續做「阿二」嘅就係香港富華國際集團創辦人陳麗華，呢位72歲嘅女士真係幾富話題性，佢本身係滿族正黃旗世家，出生於北京，不過1982年就移居香港，咁計落似乎可以算係香港女首富。


至於由佢白手興家創辦嘅富華，專門響北京搞地產項目，例如2005年北京王府井隔籬嘅金寶街就係富華開發，為咗發展呢個項目，當年富華拆咗包括京劇泰斗梅蘭芳同中國現代著名作家沈從文故居在內，合共400幾間四合院及小洋樓胡同，遭到文物界非議。但另一方面，陳麗華斥資興建中國紫檀博物館，裏面收藏幾千件紫檀木藝術品，珍貴程度甚至可以同故宮嘅紫檀收藏媲美。