採訪CY貴陽行 全港傳媒終可入場

【明報專訊】特首梁振英（CY）噚日飛咗去貴州省會貴陽，準備出席今日舉行嘅泛珠三角區域合作論壇，之前貴州主辦當局限制香港傳媒採訪，只容許5間獲邀傳媒入會場做採訪。不過，噚日政府新聞處同Emily講，幾經爭取，大會終於批准在場所有香港傳媒都可以去採訪喇。


政府新聞處爭取

CY噚日同四川省長會面時，都特別幫新聞界講好話，「香港嘅新聞界對我哋嘅工作有好大嘅幫助，因為我哋有啲信息要通過新聞界發布出去」。主辦大會就解釋，本身係因為要節約同接待能力有限，所以先會只係邀請幾家傳媒。不過家當地政府話從善如流，順應港府要求，畀所有香港傳媒都可以去採訪。


原獲邀傳媒有近位

最新安排下，之前無獲邀嘅香港傳媒，包括香港電台、商台、有線電視、無綫電視同now，可以入會場喺開幕禮、高層論壇同CY與各省長會面時採訪。不過，位置就無「獲邀傳媒」《文匯報》、《大公報》、《商報》、《香港經濟日報》同亞洲電視咁近，始終有分別。