消防著「黃金戰衣」打排球

【明報專訊】消防員打排球成日見，但係着住重裝備即火場時穿嘅「黃金戰衣」打排球就未見過。Emily噚日喺facebook見到幅相，網友指9月1日見幾個着住好似「生化衣」嘅人打排球，睇真啲原來係消防員身穿「黃金防火衣」喺堅尼地城消防局打排球。


疑早年為試新衫舒適度

炎炎夏日，Emily睇見都覺得熱，於是問吓啲消防朋友點解要咁樣打波。有前線消防員同Emily講，前年起堅尼地城消防局收到新嘅「黃金戰衣」時，大家想試吓穿起套衫做劇烈運動時套衫透唔透氣，同埋出晒汗時會否好唔舒適，聽講消防員著住套戰衣打咗10幾分鐘排球。Emily心諗，消防處早前力壓警隊，獲公務員事務局頒發最佳公眾形象金獎，都真係理所當然，始終孭住副咁重嘅裝備去救火真係唔易。