大浪西通宵P 600人fb話參加

【明報專訊】Emily收到風，話有一班外國人打算喺今個月31號，喺西貢大浪灣鹹田灣嗰頭搞通宵派對，仲會請DJ打碟，直到噚晚已經有超過600人喺facebook個Event Page度話會參加。不過，有市民同環保團體就擔心搞一個咁大型嘅派對會影響附近環境同居民。


市民環團憂擾民製垃圾

政府已打算將大浪西灣納入郊野公園範圍。長春社發言人話，派對地點附近仲有少數「日出而作日入而息」嘅市民居住，擔心派對聲浪會對佢哋造成滋擾，佢都提醒遊客應該自律清潔沙灘，保持公德心。


有鍾意行山嘅讀者同Emily反映，擔心咁多人嘅通宵派對會製造好多垃圾，破壞咁靚嘅「香港後花園」，而且鹹田灣嗰頭好隔涉，唔知啲參加者可以點樣運走啲垃圾。Emily試過聯絡其中一個搞手，但至截稿前都未有回應。