曾撐CY 黃秋生讚曾鈺成

【明報專訊】藝人黃秋生參選藝術發展局新一屆委員，Emily噚日聽到佢接受商台《在晴朗一天出發》訪問，主持人問曾表態支持梁振英參選嘅佢點睇政府現時施政，秋生顯得有啲保留。佢形容香港過去一年「亂七八糟」，但就話唔可以將責任賴晒落一個人度，「等於你話文化大革命，你係咪賴晒一個江青（四人幫之一）、賴晒一個毛澤東呀？」佢話家應該係「整體發神經、發瘟」。


港亂七八糟 不能賴晒一個人

秋生講番當時喺3個參選人入面揀咗支持CY，係覺得佢可以做得更好。佢解釋自己唔係偏幫嗰陣仲話，「唔通支持唐英年？唐英年最後有事縮吓膊頭走人，咪仲得人驚！」假設家3個參選人係林鄭月娥、余若薇同CY呢？秋生最初唔想揀，問番轉頭「乜無其他人喇咩？」結果就主動推舉曾鈺成，佢話見過對方，感覺唔錯，「佢幾好，OK喎，愈嚟愈醒目，唔知食咗乜嘢」。


擺烏龍做藝發局候選人

講番藝發局選舉，秋生話佢本身只打算做選民，點知「擺烏龍」做咗候選人，咁啱又聽到業界訴求咪試吓囉，仲借大氣電波宣傳政綱。佢希望幫到業界有個身分認同、關注活化工廈問題以爭取更多場地，仲有當局撥款要有透明度。