特首辦有4萬蚊筍工

【明報專訊】特首辦人手唔算多，早前新聞統籌專員鄧惠鈞請辭，至今仲未填補空缺，而前特首曾蔭權在任時曾開設特別助理，梁振英亦無跟隨呢個做法。不過，特首辦最近招聘「研究主任」，月薪月薪由4.3萬至4.7萬元，視乎經驗而定，合約為期兩年半，完成後有約滿酬金。呢份工無要求特別工作經驗，相信對後生仔而言都係一份筍工。


政府咁多部門、政策局已經做緊研究，究竟因乜事特首辦仲要另覓專人，特首辦回覆話，今次招聘嘅崗位，係負責政策研究及協助特首進一步落實競選政綱同埋《施政報告》中嘅承諾。


特首辦：幫CY手跟政綱

睇番招聘廣告，只要有大學學位、具良好中英文書寫同會話能力，熟悉政府架構時事，已經符合資格，人工4萬幾，同新入職政務主任（AO）相若，工作範疇係負責協助研究同制訂政策、整理公眾意見同分析政府政策、草擬演辭等。呢個位唔使聯絡各政黨或團體，似乎係對內工作為主，究竟最終成功應徵者會唔會係政圈熟口熟面嘅人，大家拭目以待。