「新警察不再粗口爛撻撻」第一

【明報專訊】林老師講粗口罵警事件，Emily同行家噚日喺旺角採訪相關支持或反對團體，活動人多，粗口之聲滿天，採訪完真係有啲頭暈暈。Emily近日睇番資料，發現原來差人搞過「無粗口標語比賽」。


根據警察官方刊物《警聲》，2005年沙田警區搞咗個「無粗口標語設計比賽」，收到71份來自同事嘅作品，冠軍作品係咁嘅﹕「廿一世紀新警察，不再粗口爛撻撻，斯文勇敢守紀律，共創市民新睇法。」亞軍﹕「你有型，我有型，唔講粗口最有型。」究竟點解警方要搞個無粗口標語比賽？Emily相信答案都好清楚。


另外，剛開始退休前休假嘅警司劉達強，噚日喺旺角行人專用區上台發言，話唔可以容忍粗口文化，點知畀網民翻舊帳，搵到佢舊年一篇訪問，當中劉sir承認14年前自己曾經對記者講粗口。


劉達強曾罵攝記

話說劉sir用咗3個鐘成功說服一個企圖跳樓女子放棄自殺念頭，點知有報館攝記指住個女人話﹕「早啲跳吖嘛，阻住我食飯！」劉sir聽到好嬲，就用粗口鬧個攝記無道德。Emily慨嘆，講粗口鬧人雖然係唔好，但衝口而出講咗又唔係十惡不赦，大家又何必咁激動呢？