四叔請天水圍狀元讀大學

【明報專訊】今年天水圍出咗個公屋狀元，就係喺中學文憑試考到7優嘅謝楚灝，佢間母校就係香港青年會李兆基書院，亦即係由恒基地產主席李兆基出資開辦嘅直資學校。人稱「四叔」嘅李兆基知道學校出咗個狀元，好鬼開心，噚日即刻頒咗相等於6年大學學費嘅獎學金畀楚灝，等佢可以唔使向政府借錢，安心讀醫科。


先畀25萬 拍心口包底

Emily計一計，呢筆獎學金有成25萬元，四叔仲拍心口話，如果第時大學加學費，佢都會包底，令到楚灝放心晒。


今次四叔都幾隆重其事，噚日派出寶貝仔李家誠親自接待楚灝，仲送出四叔親筆簽名自傳畀佢，寫上「謝楚灝惠存」。楚灝收到都幾驚喜，話要睇咗佢，希望得到一啲啟發。


楚灝仲同Emily話，噚日同李家誠傾咗半個鐘閒偈，對方鼓勵佢「要做個好醫生啊」，楚灝當然拍心口應承，「我會努力㗎喇」。Emily都希望楚灝他日可如願參加無國界醫生，幫助貧困地區嘅病人，加油！