醫護出書披露SARS故事

【明報專訊】10年前SARS爆發時，原來機電工程署人員曾經拯救過東區醫院醫護嘅性命，東區醫院前行政總監任燕珍醫生最近同Emily話當年，講番機電署人員點樣用一支「神奇煙霧棒」拯救同鞏固醫護嘅性命同軍心。佢話當年全靠工程人員爭分奪秒幫每間病房加裝抽氣系統，仲用煙霧棒示範病房空氣點樣被抽走，先可以避免醫護受感染同放心全力救人。


機電署煙霧棒定軍心

其實，任燕珍嘅古仔會連同其他胸肺科醫生嘅小故事，集結成《重新呼吸——醫護人員沙士十年的苦與樂》一書，喺今日開幕嘅書展內推出，書中有好多鮮為人知嘅故事，包括威爾斯親王醫院呼吸系統科專科醫生古惠珊講番懷孕期間點樣參與抗疫工作；廣華醫院及黃大仙醫院胸肺及呼吸科顧問醫生易國生就會講吓喺SARS期間做咗一個可能會「愧疚一生」嘅決定。