中大搞癌測試搵民記

【明報專訊】民建聯最近同中文大學合作，免費幫2萬名40至60歲男士做鼻咽癌測試，相信會吸引唔少男士參加。呢個咁筍嘅活動，其實係中大化學及病理學系主動搵民建聯幫手合作嘅，貪對方地區網絡強大，搵兩萬人參與唔難喎。


喺噚日嘅啟動禮，中大化學及病理學系陳君賜醫生話，呢個咁大型嘅活動獲嘉道理捐款，但最頭痕就係搵兩萬人參與，於是佢哋打去民建聯「求助」，因為覺得民記搵兩萬人就好似食餐飯咁簡單。


民記副主席李慧琼話，要搵兩萬人的確係挑戰，因為活動只限40至60歲男士參與，通常男人都較少參與地區活動，所以佢哋用盡各種宣傳，甚至搵女義工拉親友嚟參加。計劃會喺全港18區舉行，有啲測試活動已經排到12月，而單係噚日一場就有180人報名。


參加者報名後只需填妥個人資料，畀中大職員抽血，就可以做初步檢查，如果有確診徵狀，中大會跟進做詳細檢驗。