財爺朱古力「甘句」勉考生

【明報專訊】文憑試今日放榜，呢啲日子總有人歡喜有人愁，財政司長曾俊華就引用電影《阿甘正傳》主角Forrest Gump（湯漢斯飾演）名言勉勵學生﹕Life is like a box of chocolates. You never know what you're gonna get.（生命就好似一盒朱古力，你永遠唔會知道你將會得到乜嘢）。佢話人生有太多不可預知嘅事，就算喺過程中跌倒，只要能夠企番起身，依然可以昂首闊步走往後嘅路。


財爺喺美國成長，當年大學選修建築，話一心以為會成為建築師，但畢業後發現工作事與願違，自己捱唔住，輾轉做過唔同嘅工，包括喺老人中心做助理同司機，之後修讀教育碩士，轉去波士頓教育部教書，其後喺偶然機會下返港加入政府工作至今。


講番放榜，財爺話明白升讀大學係唔少同學和佢哋家長嘅夢想，但佢話除咗入大學，仲有好多值得考慮嘅選擇。財爺又趁住電影劇《衝上雲霄II》今晚首播，再次幫手宣傳飛機維修業，話呢行人力需求殷切，業內培訓完備，有完整晉升階梯，喺唔錯嘅選擇。


CY引居禮夫人名言打氣

特首梁振英（CY）亦喺網誌幫考生打氣，佢話科學家居禮夫人有句名言﹕「We must have perseverance and above all confidence in ourselves. We must believe that we are gifted for something, and that this thing, at whatever cost, must be attained.」CY話簡單意思即係「天生我材必有用」，預祝同學考獲佳績，至於成績未如理想嘅同學千萬唔好氣餒，換條跑道都可以實現理想。