陳家洛端午慶生

【明報專訊】公民黨陳家洛今年嘅生日撞正端午節，噚日佢就喺facebook上載家人同佢慶祝生日嘅相，不過最吸引網友嘅唔係個精緻蛋糕，而係佢嗰幾個非常省鏡嘅囡囡。


陳家洛向來有「政壇多仔公」之稱，同波蘭籍妻子先後誕下4女1子。佢噚日上載嘅慶生相，正好反映到佢屋企係幾咁熱鬧，而佢二女手抱嘅細仔道明，雖然年僅1歲，但就已經相當大隻，莫非有外國血統係會早熟啲嘅？