牛丸無牛 安全就得？

【明報專訊】早前有報道指牛丸驗出無牛，市民好關注，噚日立法會一個委員會亦討論有關問題，有議員問喺食物安全中心眼中，牛丸無牛，其實只要食物安全就無大問題，不過，若果顧客覺得有問題，亦可以等法庭裁決。


菠蘿包冇菠蘿 點界定

噚日食物安全及環境衞生事務委員會開會，討論監測對食物作虛假描述嘅機制，飲食界議員張宇人就話，「菠蘿包無菠蘿，菠蘿油更加唔係用菠蘿嘅油製造，雞尾包亦見唔到雞尾」，咁點樣界定食物成分同名稱係咪相稱？佢黨友方剛提出「熱狗係乜嘢呢？老婆餅係咪擺個老婆入去？」

食物及衛生局副局長陳肇始話，究竟牛丸要有幾多牛先至叫牛丸，議題係較複雜，現行法例無規定食物名稱要同成分有關。


人民力量陳志全問，如果叫炒牛肉變成炒袋鼠肉又點呢？食安中心助理署長李小苑話，其實牛肉、豬肉定袋鼠肉，只要係安全，基本上問題不大。但若客人話對豬肉敏感，「你炒豬肉畀我食，或認為豬肉平過牛肉，我覺得蝕底咗」，咁就要睇法庭點判。