田二少抗議寶田廁所細

【明報專訊】本報早前報道，前身係臨時中轉房屋嘅屯門寶田邨公屋單位，8736個單位嘅廁所面積不足1平方米，有邨民去廁所時連身都轉唔到，有人就要拆咗個洗手盆如廁。新民黨立法會議員田北辰同區議員蘇嘉雯，噚日同30幾個居民到立法會向房屋署長栢志高遞請願信（圖左為田北辰，右為栢志高）。


田北辰話，居民喺寶田邨嘅廁所冲涼時，經常撞牆受傷，孕婦或體型肥胖者更係難以進入廁所，要求房屋署負責。栢志高話，因為防水問題同為免滋擾居民，政府好難修改。田北辰話修改造成嘅滋擾係大家願意接受嘅，仲話會搵有公信力嘅建築公司評估，睇吓改唔改到間隔。


最後，二少喺立法會房屋事務委員會提出動議，「要求房委會提交擴大面積細小的浴室方案，若不能，則清拆此類不符合標準的間隔」，獲委員一致通過。