林新強任律師會長

【明報專訊】律師會噚日宣布理事會換莊，新一屆會長由林李黎律師事務所主管合伙人林新強擔任，噚日正式上任。新聞稿話，林新強2004年起任律師會理事，其中兩年任副會長，亦係大中華法律事務委員會及審批委員會主席。律師會形容，佢喺加強港澳台及內地律師合作、促進法律服務行業發展一直不遺餘力。


睇番林新強個網站介紹，佢主力做企業及商業交易、房地產事務，1988年起做執業律師。除咗律師會工作，佢亦係西醫工會榮譽法律顧問、十八鄉鄉事委員會法律顧問，又係建築物條例上訴審裁小組主席、貿發局內地商貿諮詢會委員。佢仲係中華海外聯誼會理事，呢個會同中方關係良好，2010年喺中聯辦協助安排下去甘肅考察。