莫乃光窒湯顯明：香港終於有手信

【明報專訊】邊個話香港無手信？前廉政專員湯顯明被揭發大手筆送禮畀中聯辦同內地官員，嗰張送禮名單好長，淨係買餅都使咗成4.8萬蚊。公專聯立法會議員莫乃光（Charles）忍唔住諷刺一下，喺facebook留status話「香港終於有手信了！這手信清單應該還會愈揭愈多！」Emily睇完都唔知好笑定嘆息。


湯顯明飲食清單變指南

Charles話，佢自己不嬲都無買貴嘢，湯顯明用嚟送禮嘅曲奇餅Jenny Bakery佢都未食過。今次佢將報章刊載嘅湯顯明送禮清單表列出嚟，除咗搞gag之外，亦都十分感慨，覺得湯顯明花成10萬蚊買酒，真係好離譜。不過，湯顯明一於好少理，近日仍然無出嚟交代，納稅人就真係㷫過辣雞！


除咗送禮清單，湯顯明嘅飲食清單都可以成為美食指南，除咗本報揭發佢成日去君悅酒店餐廳。《東方日報》昨報道，湯顯明都鍾愛北角廉署總部附近嘅「13座牛雜」、銅鑼灣南乳花生，仲有元朗石崗咖喱、沙田雞粥等。