股市賺錢 張華峰請建制派食飯

【明報專訊】Emily噚日講過，股市暢旺，唔少議員都有斬獲，本身係證券行老闆嘅金融服務界議員張華峰，相信更加盤滿鉢滿，連建制派議員都戥佢開心，乘機屈佢請食飯，呢餐飯訂喺今個月30號食，據聞會去麗港城一食店食潮州菜。飯局一呼百應，據講已經有成20人報名，隨時踴躍過平時嘅建制派飯局。Emily問張華峰預算使幾多錢請食飯？佢就好豪氣咁話自己無budget！


工聯會黃國健（KK）透露，前日一眾建制議員食早餐，有人講起建制派已經好耐無聚頭食飯，民建聯主席譚耀宗就話食飯要搵人贊助，唔少人立即起哄話張華峰近排賺唔少，好應該請食飯，即使張華峰不在場，但大家講得咁起勁，一向豪爽嘅佢事後當然無托手踭。


漁農界議員何俊賢亦「自告奮勇」提出贊助食蟹，有建制派亦唔客氣，話咁多人食飯，至少要8隻！不過KK就話自己當晚要做家訪，去唔到好可惜，佢話呢間食肆幾出名，之前民建聯陳鑑林亦請過佢哋去食，其中一次係陳鑑林賣舖賺錢後請嘅，又聽聞特首梁振英早排亦有去過食。