葉太fb：大量菲傭淪性資源

【明報專訊】新民黨主席葉劉淑儀噚日喺facebook貼咗張標題為「大量菲傭為外國人士提供性服務？」嘅圖，附上佢喺《明報》專欄嘅內容，提到香港有外籍人士同在港女傭發生不正常關係， 甚至有性剝削行為。此圖一出，就畀公民黨毛孟靜批評帶有種族歧視，仲向平機會投訴。葉太無幾耐都刪除張圖。


事後刪圖 葉太話：因為標題唔準確

葉太事後同Emily解釋，刪圖係因為圖像標題唔準確，無事實證明，所以叫負責設計嘅伙記移除。但葉太強調文章內容都係基於事實，「投訴就投訴啦」。


葉太喺本報專欄提到，做保安局長嗰時，收到外籍婦女投訴，話政府縱容菲籍女傭勾引佢嘅外籍丈夫。葉太認為外媒除咗報道本地僱主不當行為，「是否亦應多加留意大量菲籍女傭在港淪為外籍男士的性資源的問題？」


亞洲家務工工會聯會組織幹事鄧建華認為葉太嘅言論存有歧視，係「污名化」外傭，反問點解要指明係「菲傭」，認為葉太借本港弱細一群去撈政治本錢。