開開心心 澳門循環再用熊貓名

【明報專訊】國家主席習近平早前宣布再贈送一對大熊貓畀澳門，當局最終確定大熊貓去澳門嘅日期係4月30日（下周四）。兩隻大熊貓原名「蜀蓉」（雌性）同「婭林」（雄性），呢兩個名其實都幾有個性，但澳門政府噚日公布，原先喺澳門嘅一對大熊貓叫「開開」同「心心」，話呢對名係澳門人選擇，既然舊名深入民心，所以決定循環再用，將「婭林」及「蜀蓉」改名為「開開」同「心心」。


澳門行政法務司長陳海帆擔任協調員嘅「跟進中央政府送贈大熊貓工作小組」，上月底去咗成都，選定8歲嘅「蜀蓉」及7歲嘅「婭林」移民澳門。


澳門原本已有一對中央贈送嘅大熊貓「開開」、「心心」，佢哋2010年去到澳門定居，但雌性大熊貓「心心」喺2014年不幸因病離世；今次中央送贈「蜀蓉」及「婭林」畀澳門，而「開開」就會功成身退返家鄉，送回內地參加「全國大熊貓繁育計劃」幫手開枝散葉。