健身器隨時斷手

【明報專訊】康樂設施竟然變成人肉榨汁機？雖然落選東區區議員，但曾健成（阿牛）仍然好關心地區事務。佢早前發現，筲箕灣工廠街兒童遊樂場嘅健身設施「健騎機」隱藏極大危機，皆因部機嘅座位好似搖搖板咁上下郁動，但座位下面係一條鐵柱，如果有人喺用緊健騎機時，其他人唔覺意放隻手喺鐵柱上，就好易夾親手，好似榨汁一樣。


有人問，係咪真係咁誇張？阿牛噚日帶埋青蘿蔔試驗，只見使用設施嘅市民一郁，放喺鐵柱上嘅青蘿蔔即刻連皮帶肉削開兩舊。阿牛話，康文署應盡快加設安全裝置，以免市民受傷。


康文署：會檢視安全

康文署回覆話，健騎機十幾年前引入，供長者鍛煉身體，符合安全標準，過去亦無發生意外嘅紀錄，但署方已經喺健騎機附近張貼告示，提醒市民唔好喺部機前後逗留；為咗安全，未來亦會重新檢視健騎機，睇吓需唔需要改善。