英政府網聯署促「收番香港」

【明報專訊】香港有人舉起「龍獅旗」示威，激到中央領導紮紮跳，挑起愛國爭論。英國人Ethan Turner仲玩嘢，喺英國政府網站發動聯署，要求英國外交及聯邦事務部設法拯救渴望民主嘅香港人咁話。呢位Ethan Turner仁兄話，中國政府到家都未能喺香港實踐民主，令愈來愈多香港人憤恨中國；希望英國可以幫香港同中國政府交涉，提出收回香港或畀香港獨立，仲話呢件事「係我們欠咗忠實嘅港人嘅」。


英人發起 「我們欠咗港人」

聯署開放到今年8月3日當地時間下晝1點03分，至噚晚9點，已有逾1000人投票，長期進駐每小時最活躍聯署第2位。Ethan Turner稱，好多港人期望香港恢復英國民主管治。


要注意，無論係投票定發起聯署，都一定要報稱係英國人，或喺英國通常居住，但由於只係要填姓名同基本資料，即使唔係英國人，要啟動一個聯署都唔難。


Emily上網搜尋呢位Ethan Turner係何方神聖，但因為太多人用呢個名，未能肯定Ethan Turner係邊位。如果喺限期內取得10萬人聯署，英國嘅下議院或將討論事件。《南華早報》早前Today's Poll（每日一投）嘅民調顯示，如果有選擇嘅話，91％香港人會投票支持香港變番殖民地。