升遷未卜 施永遠未驚過

【明報專訊】早前有傳「港台最後武士」施永遠因抵抗處長鄧忍光嘅政治任務，罕有地不獲升正做助理廣播處長（電視），事件更激發港台員工同鄧忍光對峙。據了解，施永遠理應噚日知道自己嘅升遷去留，但就好奇怪咁仲未有消息。


施永遠由上年3月25號起署任助理廣播處長，半年後延長一次署任期，Emily聽聞，港台高層、公務員事務局同公務員敍用委員會嘅代表，理應喺噚日、即施永遠署任正式一年後，開會審議佢嘅升遷問題，若果決定佢唔可以坐正嘅話，佢就要做番電視部總監。


Emily噚日打畀施永遠，佢話仲未聽到消息，又話因為從未遇過呢啲問題，所以唔知係咪正常。佢笑言，對自己嘅升遷真係冇乜所謂，以平常心面對，重申希望立法會能夠動用《權力及特權法》，徹查港台係咪受政治干預。