800跑手重踏葉伯練跑路

【明報專訊】人稱「葉伯」嘅資深跑手葉倫明舊年12月尾過身，享年93歲，一班跑友為咗紀念佢舉辦「419葉倫明紀念盃」長跑活動，噚日朝早8點半舉行，跑道由寶雲道近司徒拔道至寶德臺，全程大約3.5公里，約800名跑手浩浩蕩蕩着住印有葉伯肖像、寫住「生命不息，永不停步」嘅黃色紀念跑衣，重踏葉伯昔日練跑嘅路徑，沿路欣賞佢望過嘅風景，紀念呢位本港最老跑手。


歐耀佳盼跑到老

噚日朝早天氣清涼，現場氣氛熱烈，笑聲此起彼落，Emily望望周圍留意有無名人參與，就捕獲咗醫生歐耀佳。歐醫生同Emily講，佢參加過接近40次馬拉松，以前都見過葉伯，仲同對方講聲「加油」，但葉伯掛住跑步無睬到佢，歐醫生當然唔介意，仲話希望第時年紀大可以好似葉伯咁「跑到老」。


活動搞手盧松昌（盧sir）話，多得一眾義工同跑友支持，盧sir仲話「唔夠喉」，暫定「第二屆葉倫明紀念盃」喺出年元旦舉行，模式同今次差唔多，歡迎義工同跑友到時多多支持。