講政體清明 德成諗起唐太宗

【明報專訊】兩會閉幕一個禮拜，新任國家主席習近平主打反貪腐，俗語話上行下效，唔怪得民政事務局長曾德成都引經據典，舉唐太宗幾件史事，話領導人以身作則，形成清明嘅政治體制。


話「約法三章」令人憧憬

喺人大政協兩會上，習近平話堅決反對享樂主義、奢靡之風，堅決同一切消極腐敗現象作鬥爭；總理李克強就「約法三章」，承諾政府會使少啲錢。曾德成喺網誌《局長隨筆》話，反貪腐嘅決定，一定係經過領導班子集體深思熟慮，參照咗今日國情同民情，又話「約法三章」令人憧憬，香港特區直轄於中央人民政府，自然亦要自勉。不過Emily諗起香港當年成功反貪腐，最重要係因為成立咗廉署喎。


德成局長引用唐太宗貞觀年間幾件事，其中唐太宗喺貞觀元年想起一座宮殿，最終因為諗起大禹治水得到百姓擁護，秦始皇勞民傷財招致滅亡，所以決定唔起。另外，貞觀年間又有人建議唐太宗封禪，以示受命於天，但宰相魏徵話國未富強而勸阻，跟住就話以國事為重，所以先無封禪。佢話，貞觀之治唔係靠殘酷刑罰，而係以身作則，喺最高層形成一個清明嘅政治體制。