賣CSD車牌被批 政府話無問題

【明報專訊】由2006年開始市民可以買自訂車牌，不過近排懲教署中人就唔多高興，皆因上個月拍賣嘅其中一個自訂車牌「CSD HK」，就同懲教署（Hong Kong Correctional Services Department）英文縮寫好相近，搞到工會都出聲希望叫停。民建聯立法會議員葉國謙噚日就有個書面質詢，問政府按乜嘢準則審批「CSD HK」，同埋將來會唔會唔拍賣「CSD」。


署理財經事務及庫務局長梁鳳儀回覆，「CSD」可以代表唔同人、組織或機構名稱嘅縮寫，唔一定係屬於某個政府部門，而唔少傳統車牌字首都係「HK」，唔一定係代表香港政府，英文字母「A」、「F」同「AM」組成嘅車牌登記號碼，先至係留畀政府車，所以運輸署長批准拍賣「CSD HK」，亦唔諗住拒絕「CSD」嘅自訂車牌申請。