唐唐出聲明企硬：假酒指控totally false

【明報專訊】前政務司長唐英年（唐唐）拍賣珍藏，被外地酒評人質疑其中3批次葡葡酒嘅真偽，拍賣行佳士得上周臨時抽起一瓶唔賣，呢件事搞到唐唐都好唔高興，據知出產葡萄酒嘅酒莊都證明唐唐嘅珍藏無問題，所以唐唐噚日發咗一份措辭強硬嘅聲明反駁，話「假酒」指控「毫無事實根據同錯誤（totally unsubstantiated and false）」，仲話對於無理指控保留法律追究權利。


買酒逾30年 好謹慎

唐唐透過佳士得拍賣810批次葡萄酒，其中3批次被外國酒評人質疑；上周六拍賣時，全場單一瓶最貴、估價達70萬元嘅La Tache Grand Cru被抽起。唐英年噚日發聲明想以正視聽，佢話自己買酒逾30年，對於出產地來源一向好謹慎，而今次被指有問題嘅酒，係經有信譽嘅代理入貨，仲話「事實上，DRC（羅曼尼．康帝酒園）亦有了解這批酒的產地來源，對此並無提出質疑」；唐唐又質疑冇去過產地、只係睇過酒樽標籤就自稱了解紅酒嘅人，並無說服力！


Emily就事件向佳士得查詢，問吓點處理抽起嘅拍品，但至截稿前未獲回覆。唐唐呢次拍賣總成交額逾4800萬，扣除約兩成交易佣金，估計套現近4000萬元。